विशेष महाधिवेशनमा सहभागी हुन कांग्रेस प्रतिनिधि काठमाडौं जाने क्रम जारी

महामन्त्रीद्वय गगन थापा र विश्वप्रकाश शर्माले बोलाएको विशेष महाधिवेशनमा सहभागी हुन नेपाली कांग्रेसका प्रतिनिधिहरु काठमाडौं जाने क्रम जारी छ। विशेष महाधिवेशन पर्सि आइतबार र सोमबार हुँदैछ । महाधिवेशनमा भाग लिन भन्दै सिरहाबाट महाधिवेशन प्रतिनिधि चुनिएका ६० बढी काठमाडौं लागेका छन् ।

 

 

सिरहाका चार निर्वाचनका १०३ जना महाधिवेशन प्रतिनिधि छन् । जसमध्ये क्षेत्र–१ बाट १५ जना, क्षेत्र–१०, क्षेत्र–२५ र क्षेत्र–४ बाट १२ जना गरी ६२ जना सहभागी भइरहेको जिल्ला सचिव शैलेन्द्र यादवले जानकारी गराए । केही महाधिवेशन प्रतिनिधि काठमाडौं पुगेका छन् । यो क्रम भोलिसम्म नै जारी रहने यादवले बताए । विगतमा पार्टी सभापति शेरबहादुर देउवा पक्षमा रहेका जिल्ला सचिव यादव, सह–सचिव रामबाबु यादव, उपसभापति सुनिल कुमार महतोलगायत विशेष महाधिवेशनका लागि हस्ताक्षर संकलन गरेर पठाउने कार्य गरिरहेका थिए । कोइराला पक्षका नेपाल ट्रेड युनियन कांग्रेसका सभापति संजीव उपाध्याय पनि अहिले विशेष महाधिवेशनमा सहभागी हुँदैछन् । शेखर कोइराला पक्ष मानिएका महासमिति सदस्य डा.सुभाष चन्द्र यादव, पूर्वजिल्ला उपसभापति रामसुन्दर चौधरीलगायत पनि हस्ताक्षर गर्नेमा थपिएपछि सिरहामा अब शेखर कोइराला र देउवा पक्षमा महाधिवेशन प्रतिनिधि कम देखिएको छ।

 

 

 

विशेष महाधिवेशनमा बहुमत भन्दा बढी प्रतिनिधिले हस्ताक्षर गरेका छन् । ‘देशको अहिले राजनीतिक अवस्था फेरिएको छ। कांग्रेसमा आम नागरिकले पनि सुधार खोजिरहेको छ। विधानको पालना मुख्य विषय हो । अहिलेको नेतृत्वमा पार्टी चुनावमा जाँदा राम्रो सन्देश जाँदैन,' सचिव यादवले भने, ‘पार्टीले समयमै नियमित महाधिवेशन गर्नुपर्थ्यो । त्यो विभिन्न बहानामा ढिलाइ गरेको छ। अब विशेष अधिवेशन नै हुनुपर्छ ।’ आम कार्यकर्ताको आवाज नेतृत्व वर्गले सम्बोधन गर्नुपर्ने उनले सुनाए ।