पूर्वराजा ज्ञानेन्द्र शाहद्वारा पृथ्वी जयन्तीको अवसरमा सन्देश: देशको भविष्य बचाउन युवालाई सशक्त बनाउनु आवश्यक

काठमाडौं: पूर्वराजा ज्ञानेन्द्र शाहले पृथ्वी जयन्तीको अवसरमा जारी सन्देशमा देशले दुई दशक यतादेखि सामना गरिरहेको राजनीतिक, आर्थिक र सामाजिक संकटप्रति चिन्ता व्यक्त गरेका छन्।

श्रीमान शाहले आफ्नो सन्देशमा भनेका छन् कि “देश विभिन्न चपेटामा परेको छ। झण्डै दुई दशक अघि शान्ति ल्याउने, आर्थिक प्रगतिमा देशलाई लैजान्ने र स्थायित्व दिने उद्देश्यसहित सत्तामा पुगेका दलहरुको चाहना अनुसार हामीले श्रीपेच जनतालाई बुझाएका थियौं। तर नारायणहिटिबाट बाहिरिएको दुई दशक बित्दा पनि देशले सामना गरिरहेको संकटले हामीलाई चिन्तनमा तुल्याएको छ।”

पूर्वराजाले मुलुक केवल राजाको नभई जनताको समान स्वामित्व भएको बताएका छन्। उनले सबै नेपालीलाई कर्तव्य बोध गर्दै “यो देश बनेको छैन र बन्दैन पनि, सबैले मिलेर पृथ्वीपथमा लाग्नु पर्दछ” भन्दै आह्वान गरेका छन्।

उनी युवाको विदेश पलायनप्रति पनि चिन्तित देखिएका छन् र बताएका छन् कि “यदि युवालाई प्रभावकारी रूपमा उपयोग गर्न सकिएन भने मुलुक असफलताको संघारमा पुग्न सक्छ। जनता सक्षम र बलिया भए मात्र देश बलियो हुन्छ। युवा प्रयोग मात्र गर्ने प्रवृत्तिले असन्तोष जन्माउँछ र देशमा जनधनको हानी हुन्छ।”

पूर्वराजाले राष्ट्रिय सहमति बिना निकास खोज्न समय फाल्नुभन्दा सबै मिलेर अगाडि बढ्नुपर्ने जोड दिएका छन्। उनले सन्देशको अन्त्यमा भनेका छन्, “जनता र राजाले एकीकरण गरेर निर्माण गरेको नेपाल राष्ट्रको समग्र हितलाई आत्मसात गर्दै सबल राष्ट्र निर्माणको महान कार्यमा सबैलाई जोडे। नेपाललाई फेरि उठाऔँ। श्री गोरखनाथले हामी सबैलाई सत्बुद्धि दिऊन्। जय नेपाल।”