बञ्चरेडाँडामा स्थानीयको आन्दोलन जारी, फोहोर बोक्ने ३०० गाडी रोकिए

काठमाडौं । बञ्चरेडाँडाका स्थानीयले आज पनि काठमाडौं उपत्यकाको फोहोर विसर्जनमा अवरोध गर्दै आन्दोलन गरेका छन् ।

 

 

आफूहरूका नयाँ पुराना मागहरू पूरा नभएको भन्दै उनीहरूले आज दोस्रो दिन ३०० गाडी रोकेका छन् ।

बञ्चरेडाँडा सेनेटरी ल्यान्डफिल साइटमा आज पनि स्थानीयले आन्दोलन जारी राखेको धुनिबेँसी नगरपालिका वडा नम्बर ३ का अध्यक्ष प्रकाश हमालले जानकारी दिए ।

 

 

"हिजो वार्ता भएको थियो । सो वार्ता निष्कर्षविहीन बनेपछि आज पनि स्थानीयले आन्दोलन जारी राखेका छन् । महानगरका फोहोर बोक्ने ३०० गाडी रोकिएका छन्,” अध्यक्ष हमालले भने ।

आन्दोलनरत स्थानीय अमृत तामाङले अहिले केही मागहरू नयाँ थप गरिएको बताए । "अहिले केही नयाँ मागहरू थप भएका छन् । त्यसबाहेक अरु पुरानै मागहरू छन् । काठमाडौं महानगरपालिकाले पनि वार्तामा बोलाएर समाधान खोज्नुपर्छ," उनले भने ।

 

 

बुधबार सहरी विकासमन्त्री कुलमान घिसिङसँगको वार्ता निष्कर्षविहीन भएको थियो । काठमाडौंबाट दैनिक करिब ७ सय टन र अन्य पालिकाबाट ७ सय टन गरी जम्मा १४ सय टन फोहोर दैनिक बञ्चरेडाँडा पुग्छ ।

स्थानीयले आफूहरूका मागहरू पूरा नभएको बताइरहँदा महानगरपालिकाले भने माग पूरा भइसकेको तर, गाडी तोडफोडको मुद्दा फिर्ता लिनुपर्ने भन्दै अनावश्यक आन्दोलन गरेको दाबी गर्दै आएको छ ।

 

यसअघि मन्त्री घिसिङले १५ दिनभित्रमा समस्या समाधान गर्ने प्रतिबद्धता जनाएका थिए ।